gaia-web_

2012 urtean sortu zuten Aretxabaletako Udalak, Mondragon Unibertsitateko Humanitate eta Hezkuntza Zientzien Fakultateak eta Arteman Komunikazioak Euspot euskarazko spot lehiaketa.

Lehiaketaren helburua dira euskarazko sormena bultzatzea eta publizitate arloan euskararen erabilera sustatzea. Horretarako, antolatzaileek urtero gai desberdin bat proposatzen dute eta lehiakideek, nahi duten estilo, teknika eta baliabideak erabilita, erantzun beharko diote sormen erronka horri. Antolatzaileen asmoa da aurkeztutako lanei ahalik eta hedapen handiena ematea.

 

2021EKO GAIA:
NEKAZARITZATIK BIZI NAHI DUGU!

 

Egin beharreko lana

Telebista bitartez edo sare sozialetan zabaltzeko ikus-entzunezko iragarkia izango da.

Publizitate spot-aren iraupena: 30 segundo gehienez.

 

Kontestua

2015a geroztik Euskadin emakume nekazarien estatutua dugu eta Nazio Batuen Erakundeak 2019-2028 Familia Nekazaritzaren hamarkada izendatu du. Efemeride horiek baliatu ditugu Euskal Herrian hain sustraituta dagoen ustiapen mota hori, arriskuan dagoena, bultzatzeko. Gazteek heldu behar diote horri, beraien esku dago horren irautea, eta gizartearen esku, ustiapen horietako elikagaiak kontsumitzea.

Lurrak ematen diguna ustiatzetik bizi dira Euskal Herriko familia asko eta asko, eta horiei zor diegu, lanpostu ugari sortzeaz gain, gure lurra eta paisaia zaintzea eta gure natura ingurunea hobetzea. Bizitzeko beste modu bat. Tokiko produktuak, kalitatezko produktuak. Km 0. Jasangarria.

 

Helburu nagusia

Sortu 30 segunduko iragarkia, gazteak familia nekazaritzatik bizitzera animatzeko.

Helburua gazteak eta batez ere emakumeak landa eremura gerturatzea izan behar da. Kontzientziazio kanpaina baterako spota sortu beharko da, bertako familia nekazaritzak ingurumen eta gizarte jasangarritasunari ematen dion guztia balioan jartzeko eta lehen sektorea indartzeko. Zer da familia nekazaritza? Nekazaritza, abeltzaintza eta basogintza ustiatzeko modu bat da.

Hauek dira familia nekazaritzaren gaur egungo erronkak: elikadura, krisi klimatikoa, lurraldearen antolaketa, jasangarritasun ekonomikoa eta gizateriaren ongizatea.

 

Targeta

Euskal gazteriari zuzendutako kanpaina da.

 

Derrigorrezko baldintzak

  • Lanak euskaraz sortu beharko dira.
  • Musikaren erabilerak baldintza hauek bete behar ditu: lizentzia librekoa, spotentzat propio sortutakoa edo www. audionetwork.com-ek lehiaketarako jarritako bildumatik.